ប្រយ័ត្នទឹកចុងក្រោយ ! ល្បិចកាប់ឈើសេសសល់បង្ហើយលើដីសម្បទានសង្គមកិច្ចជិត១ម៉ឺនហិកតានៅខេត្តរតនគិរី របស់ក្រុមហ៊ុន ដួង ស្រួច គ្រុប

យោងតាមស្មារតីអនុក្រឹត្យលេខ៥០-៥១-៥២អនក្រ.បក ចុះថ្ងៃទី០៥ ខែកុម្ភៈ ឆ្នាំ២០១៣ , អនុក្រឹត្យលេខ២២០អនក្រ.បក ចុះថ្ងៃទី០៧ ខែឧសភា ឆ្នាំ២០១៣ , អនុក្រឹត្យលេខ៩៤-៩៥-៩៦-៩៧-៩៨-៩៩ និងលេខ១០០អនក្រ.បក ចុះថ្ងៃទី១២ ខែមីនា ឆ្នាំ២០១៤ រាជរដ្ឋាភិបាលកម្ពុជាដែលមានសម្តេចអគ្គមហាសេនាបតីតេជោ ហ៊ុន សែន ជាប្រមុខ បានសម្រេចកាត់ផ្ទៃដីសម្បទានសេដ្ឋកិច្ចឋិតនៅស្រុកបរកែវ និងស្រុកលំផាត់ ខេត្តរតនគិរី ទំហំ៧ ២៦៣,៨៧៧៥ហិកតា ពីក្រុមហ៊ុនឯកជនចំនួន១០ (ក្រុមហ៊ុនអេលែវ ប៊ីអិម យ៉ញស្តុក ៣ ៩៦១,៥៩៦៣ហិកតា ,ក្រុមហ៊ុនម្កុដពេជ្រ អភិវឌ្ឍន៍កសិ-ឧស្សាហកម្ម ៣២,៧៧៩០ហិកតា ,ក្រុមហ៊ុនជីង ហ្សុងរី ១៤៧,៧៣៤២ហិកតា ,ក្រុមហ៊ុនស៊ី អ ឌី ៧៥១,៦៦៤៣ហិកតា ,ក្រុមហ៊ុនវាសនា អ៊ិនវេសមេន ៩១៩,៦០៦៤ហិកតា ,ក្រុមហ៊ុនដូនពេញ អាហ្គ្រីកូ ៣១៣,៦៩៩១ហិកតា,ក្រុមហ៊ុនអេស ខេ ផ្លេនថេសិន ២២៧,៣៣៩៧ហិកតា ,ក្រុមហ៊ុន៧មករា ផារី ៦៤,០៩០៩ហិកតា ,ក្រុមហ៊ុនហ៊ង អាន អូរយ៉ាដាវ ៣៥០,១៧៥៦ហិកតា និងក្រុមហ៊ុនហូលឡី អ៊ីខូ អ៊ិនដាស្ទៀល ៤៩១,១៩២០ហិកតា) សម្រាប់ធ្វើប្រទានកម្មជូនប្រជាពលរដ្ឋទំហំ៦ ៤១០,៨៣៧៩ហិកតា មានចំនួន១ ៤១១គ្រួសារជាកម្មសិទ្ធិ និងសម្រាប់រក្សាទុកបំពេញតម្រូវការកំណើនប្រជាពលរដ្ឋ ព្រមទាំងសាងសង់ហេដ្ឋារចនាសម្ព័ន្ធទំហំជាង៨៥៣,០៣៩៦ហិកតា ។

ក្នុងចំណោមផ្ទៃដីសរុបប្រមាណ៧ ២៦៣ហិកតា ឋិតនៅស្រុកលំផាត់ និងស្រុកបរកែវ ខេត្តរតនគិរី ដែលរាជរដ្ឋាភិបាលសម្រេចកាត់ចេញពីដីសម្បទានសេដ្ឋកិច្ចរបស់ក្រុមហ៊ុនចំនួន១០ ដើម្បីធ្វើអនុបយោគជាដីឯកជនរបស់រដ្ឋ និងសម្រាប់ធ្វើប្រទានកម្មជូនប្រជាពលរដ្ឋចំនួន១ ៤១១គ្រួសារជាកម្មសិទ្ធិ ព្រមទាំងកសាងហេដ្ឋារចនាសម្ព័ន្ធនានានោះ គឺមានផ្ទៃដីទំហំប្រមាណ៦ ១៣១ហិកតា ត្រូវបានក្រសួងកសិកម្ម រុក្ខាប្រមាញ់ និងនេសាទ អនុញ្ញាតឲ្យក្រុមហ៊ុនឯកជនមួយឈ្មោះ «ក្រុមហ៊ុន ដួង ស្រួច គ្រុប» មានលោក ដួង ស្រួច ជាអគ្គនាយកក្រុមហ៊ុន ធ្វើអាជីវកម្មកាត់ប្រមូលផល-អនុផលព្រៃឈើក្រោមហេតុផល «កែច្នៃបំពេញតម្រូវការប្រើប្រាស់ក្នុងស្រុក និងនាំចេញ» តាមស្មារតីលិខិតលេខ៣២៥១កសក ចុះថ្ងៃទី១៣ ខែមេសា ឆ្នាំ២០១៧ និងលិខិតលេខ៣៧៩១កសក ចុះថ្ងៃទី០២ ខែឧសភា ឆ្នាំ២០១៧ ។

កាលពីថ្ងៃទី០៣ ខែឧសភា ឆ្នាំ២០១៧កន្លងទៅថ្មីៗ លោក ដួង ស្រួច អគ្គនាយកក្រុមហ៊ុន ដួង ស្រួច គ្រុប បានធ្វើលិខិតផ្លូវការមួយច្បាប់គោរពជូនឯកឧត្តម ថង សាវុន អភិបាលនៃគណៈអភិបាលខេត្តរតនគិរី ស្មើសុំក្រុមការងារថ្នាក់ខេត្តចូលរួមសហការកំណត់ព្រំដីក្នុងគម្រោងដីសម្បទានសង្គមកិច្ចប្រមាណ៦ ១៣១ហិកតា ដើម្បីមានមូលដ្ឋានធ្វើការកាត់ប្រមូលផល-អនុផលព្រៃឈើ យកមកបង់ពន្ធថ្លៃសួយសារ និងបុព្វលាភជូនរដ្ឋឲ្យអស់លទ្ធភាព ។

ក្រោយមក រដ្ឋបាលព្រៃឈើក៏បានចេញលិខិតបញ្ជាបេសកកម្មលេខ៤៧៦រព.រផ.ប ចុះថ្ងៃទី២៨ ខែមិថុនា ឆ្នាំ២០១៧ ចាត់មន្ត្រីចំនួន៣នាក់ឲ្យចុះពិនិត្យវាយតម្លៃលើដំណើរការអនុវត្តគ្រប់គ្រងដីសម្បទានសង្គមកិច្ចរបស់ក្រុមហ៊ុន ដួង ស្រួច គ្រុប ដោយចេញដំណើរពីថ្ងៃទី២៨ ខែមិថុនា ឆ្នាំ២០១៧ និងត្រឡប់មកវិញនាថ្ងៃទី០៥ ខែកក្កដា ឆ្នាំ២០១៧ ។

ពាក់ព័ន្ធនឹងក្រុមហ៊ុន ដួង ស្រួច គ្រុប នេះដែរ សេចក្តីរាយការណ៍ពីខេត្តព្រះវិហារបានឲ្យដឹងថា ដីសម្បទានសង្គមកិច្ចសម្រាប់បែងចែកជូនប្រជាពលរដ្ឋជាកម្មសិទ្ធិទំហំប្រមាណជាង១ ៥០០ហិកតា ឋិតនៅស្រុកជាំក្សាន្ត ខេត្តព្រះវិហារ ដែលរាជរដ្ឋាភិបាលកាត់ចេញពីផ្ទៃដីសម្បទានសេដ្ឋកិច្ចរបស់បណ្តាក្រុមហ៊ុនមួយចំនួននោះ ក៏ត្រូវបានធ្លាក់ទៅក្នុងដៃក្រុមហ៊ុន ដួង ស្រួច គ្រុប ធ្វើអាជីវកម្មកាត់ប្រមូលផល-អនុផលព្រៃឈើ ប៉ុន្តែអស់រយៈពេលជាច្រើនឆ្នាំហើយ សកម្មភាពកាត់ប្រមូលផល-អនុផលព្រៃឈើរបស់ក្រុមហ៊ុនមិនទាន់បញ្ចប់នៅឡើយ ខណៈប្រភពព័ត៌មានខ្លះបានបង្ហើបប្រាប់ឲ្យដឹងថា ក្រុមហ៊ុន ដួង ស្រួច គ្រុប នេះ កាប់ឈើ «រាលកៃ» រហូតដល់ក្រៅរង្វង់ផ្ទៃដីសម្បទានសង្គមកិច្ចទៀតផង ។

ក្រុមអ្នកឃ្លាំមើលវិស័យព្រៃឈើនៅកម្ពុជាបានលើកឡើងថា បើជាដីព្រៃស្តុកតែម្តង ទំនងជារាជរដ្ឋាភិបាលមិនអាចសម្រេចធ្វើប្រទានកម្មជូនប្រជាពលរដ្ឋជាកម្មសិទ្ធិបានទេ គឺអាចជាដីព្រៃរេចរឹល ទើបរាជរដ្ឋាភិបាល ធ្វើប្រទានកម្មជូនប្រជាពលរដ្ឋជាកម្មសិទ្ធិក្នុងលក្ខណៈជាដីសម្បទានសង្កមកិច្ចបាន ។ ចុះហេតុអ្វីបានជាក្រុមហ៊ុន ដួង ស្រួច គ្រុប សម្លឹងឃើញមានឈើសម្រាប់កាប់ប្រមូលផលទៅកើតទៀត ? ឬក៏គ្រាន់តែជា «ឈ្នាន់» ដើម្បីឈានទៅកាប់ឈើនៅតំបន់ផ្សេងៗទៀតក្បែរៗនោះ ?

មជ្ឈដ្ឋានអ្នកវិភាគកិច្ចការសង្គមជាពិសេសលើវិស័យព្រៃឈើកម្ពុជាបានលើកឡើងថា ឈើនៅកម្ពុជាបានទទួលរងវិនាសកម្មយ៉ាងធំធេងរួចទៅហើយក្រោមរូបភាព «សម្បទានដីសេដ្ឋកិច្ច» ខណៈក្រុមឈ្មួញទទួលបានដីសម្បទានសេដ្ឋកិច្ច និងក្រុមឈ្មួញឈើ ព្រមទាំងមន្ត្រីពុករលួយសមគំនិតគ្នាប្រមូលលុយដាក់ហោប៉ៅ ក្លាយជាសេដ្ឋីរៀងៗខ្លួន ។ ដូច្នេះ ក្នុងករណីក្រុមហ៊ុន ដួង ស្រួច គ្រុប អាចមានលទ្ធភាព និងឱកាសកាប់បំផ្លាញព្រៃឈើក្រោមរូបភាព «ដីសម្បទានសង្គមកិច្ច» បន្តទៀតនោះ គឺប្រាកដណាស់ ឈើដែលនៅសេសសល់បន្តិចបន្តួចពីការបំផ្លាញក្រោមរូបភាព «ដីសម្បទានសេដ្ឋកិច្ច» ពីអតីតកាល នឹងវិនាសហិនហោច «បង្ហើយ» នៅទឹកចុងក្រោយតែម្តង ។ ចប់ ឯវំ ៕