ភ្នំពេញ: ក្រសួងមហាផ្ទៃ ក្រសួងយុត្តិធម៌ ក្រសួងសេដ្ឋកិច្ច និងហិរញ្ញវត្ថុ បានរៀបចំធ្វើ សន្និសីទសារព័ត៌មានរួមគ្នា ជាសាធារណៈ ស្តីពីចំណាត់ការផ្លូវច្បាប់ ចំពោះអង្គការមូលនិធិ អភិវឌ្ឍន៍អាស៊ីអាគ្នេយ៍ (AIF) , សមាគមអ្នកប្រឹក្សាយោបល់វិនិយោគ (ICA) និងក្រុមហ៊ុន Empire Big Capital Limited (EBC) និងបុគ្គលពាក់ព័ន្ធ ក្នុងករណីប្រតិបត្តិការគ្មានការអនុញ្ញាត ក្នុងវិស័យមូលបត្រទាក់ទង ការឆបោកលុយប្រជាពលរដ្ឋ ជាង ៦០ លានដុល្លារអាមេរិក ដែលធ្វើឡើង តាមរយៈការដាក់ទុនវិនិយោគ។
សន្និសីទនេះ ធ្វើនៅសាលប្រជុំអគារ S ទីស្តីការក្រសួងមហាផ្ទៃ នៅព្រឹកថ្ងៃទី៣០ ខែឧសភា ឆ្នាំ២០១៧ ដោយមានការចូលរួម ពីលោកប្រាក់ សំអឿន អគ្គនាយក នៃអគ្គនាយកដ្ឋានរដ្ឋបាល។ លោកឧត្តមសេនីយ៍ឯក ឌី វិជ្ជា ប្រធាននាយកដ្ឋានកណ្តាលសន្តិសុខ។ លោកកើត រិទ្ធ រដ្ឋលេខាធិការ ក្រសួងក្រសួងយុត្តិធម៌។ លោកងី ច័ន្ទផល រដ្ឋលេខាធិការ ក្រសួងមហាផ្ទៃ។ លោក ស៊ូ សុជាតិ អគ្គនាយក គណៈកម្មាធិការ មូលបត្រកម្ពុជា។ លោកស្រី ងួន សុខា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ។
ការធ្វើសន្និសីទកាសែតបានធ្វើឡើង បន្ទាប់ពីប្រជាពលរដ្ឋជាច្រើន នៅតាមបណ្តារាជធានី ខេត្ត បានដាក់ពាក្យបណ្តឹងប្តឹង ប្រធានអង្គការ AIF , ICA និងក្រុមហ៊ុន EBC ទៅស្ថាប័នតុលាការ ក្រសួងមហាផ្ទៃ រដ្ឋសភា ខុទ្ទកាល័យសម្តេចនាយករដ្ឋមន្ត្រី ក្រសួងយុត្តិធម៌ និងស្ថាប័នផ្សេងៗ កាលពីថ្ងៃទី៨ ខែឧសភា ឆ្នាំ២០១៧ ឲ្យជួយអន្តរាគមន៍ដល់ពួកគាត់។
លោកងី ច័ន្ទផល រដ្ឋលេខាធិការក្រសួងមហាផ្ទៃ បានថ្លែងថា ខាងក្រសួងមហាផ្ទៃ និងស្ថាប័នពាក់ព័ន្ធ បានជួបជាមួយប្រជាពលរដ្ឋ អំពីការងារដែលបានធ្វើ និងវិធានការ ដែលបានដាក់ចេញ និងជម្រាបប្រជាពលរដ្ឋ អំពីសារបានដែលបានធ្វើកន្លងមក ហើយនឹងសកម្មភាព ឆ្លងដែនខុសច្បាប់របស់អង្គការ និងសមាគម ទាំងបីនោះ ហើយក៏បានជម្រាបជូន អំពីវឌ្ឍនភាព នឹងដំណើរការនីតិវិធី តាមផ្លូវច្បាប់ ដែលបានធ្វលកន្លងមក។ ក្រសួងបានសហការ ជាមួយក្រសួងពាក់ព័ន្ធ ដើម្បីបន្តជម្រុញនីតិវិធីច្បាប់ ដើម្បីឲ្យប្រជាពលរដ្ឋ បានទទួលផលមកវិញ ក៏ដូចជាចាប់ខ្លួន ឬក៏ជនដែលបង្កការបោកប្រាស់ ប្រជាពលរដ្ឋ។
លោកបានបញ្ជាក់ថា បញ្ហានេះ កើតឡើងតាំងពី២ឆ្នាំមុនម្ល៉េះ ដោយរាជរដ្ឋាភិបាល បានបង្កើតក្រុមការងារ និងមានវិធានការផង ហើយបានផ្អាកសកម្មភាព របស់អង្គការ សមាគម និងក្រុមហ៊ុន ទាំងបីនេះ និងបានផ្សព្វផ្សាយទៅដល់ ប្រជាពលរដ្ឋ សូមកុំឲ្យចាញ់បោកបន្តទៀត។
លោកឧត្តមសេនីយ៍ឯក ឌី វិជ្ជា ប្រធាននាយកដ្ឋានកណ្តាលសន្តិសុខ បានមានប្រសាសន៍ថា ជនល្មើសដែលដើរបោកប្រាស់ ប្រជាពលរដ្ឋ កន្លងមកនេះ មានដូចជា ឈ្មោះ Tan Tze Chin ហៅ Saen Tan ជនជាតិម៉ាឡេស៊ី ប្រធានក្រុមហ៊ុន EBC។ ឈ្មោះ ឡុង សម្បត្តិ ប្រធានក្រុមហ៊ុន ប៊ីអិន អ៊ិនវេសមិន អ៊ែតវ៉ាយហ្សីរី និងជាប្រធានទីផ្សារ របស់ក្រុមហ៊ុន EBC។ ឈ្មោះ ជីហ្គោ សាលី ប្រធានសមាគម ICA ។ ឈ្មោះ ហួត សុវណ្ណ ប្រធានអង្គការ AIF។
ជាមួយគ្នានេះ លោកឧត្តមសេនីយ៍ឯក ឌី វិជ្ជា សូមឲ្យប្រជាពលរដ្ឋ បានយល់ បានជ្រាប មុននឹងធ្វើការសម្រេចចិត្ត ដាក់ទុនវិនិយោគ ទៅលើអ្វីមួយ សូមឲ្យសិក្សាស្រាវជ្រាវ ជាពិសេសពិភាក្សា ជាមួយអាជ្ញាធរមូលដ្ឋានថា តើអង្គការ ឬក៏ក្រុមហ៊ុន នឹងពិតប្រាកដដែរឬទេ? ហើយក៏សូមផ្សព្វផ្សាយ លេខទូរស័ព្ទរបស់ នាយកដ្ឋានកណ្តាលសន្តិសុខ ផងដែរ សម្រាប់ប្រជាពលរដ្ឋទូទៅ ដែលមានបញ្ហាជួបប្រទះ ករណីចាញ់បោកដាក់ប្រាក់ ទទួលការប្រាក់បានខ្ពស់។ លេខទូរស័ព្ទ ០៣១ ៦០១២៣៤៥ , ០៣១ ២០១២៣៤៥។
ប្រធានប្រតិបត្តិការក្រុមហ៊ុន អែមផាយ ប៊ីក ខាភីថល ស៊ី (EBC) ប្រធានអង្គការមូលនិធិ អភិវឌ្ឍន៍អាស៊ីអាគ្នេយ៍ (AIF) និងប្រធានសមាគម អ្នកប្រឹក្សាយោបល់ វិនិយោគ (ICA) បានត្រូវប្រជាពលរដ្ឋ រាប់រយនាក់ មកពីតាមបណ្ដាខេត្តរាជធានី លើកគ្នាមកដាក់ពាក្យបណ្ដឹង នៅសាលាដំបូង រាជធានីភ្នំពេញ កាលពីថ្ងៃទី៨ ខែឧសភា ឆ្នាំ២០១៧ រឿងឆបោកលុយជាង ៤៦ លានដុល្លារអាមេរិក ដែលធ្វើឡើង តាមរយៈការដាក់ទុនវិនិយោគ។ បណ្ដឹងនេះមានប្រជាពលរដ្ឋ ចំនួន៥.៦៧៤គ្រួសារ នៅគ្រប់រាជធានី-ខេត្តទូទាំងប្រទេស បានមូលមតិគ្នា ប្ដឹងបុគ្គលឈ្មោះ ស៊ាន តាន់ ជនជាតិម៉ាឡេស៊ី ជាប្រធានប្រតិបត្តិការក្រុមហ៊ុន អែមផាយ ប៊ីក ខាភីថល (Empire Big Capital Limited) ហៅកាត់ថា ក្រុមហ៊ុន អ៊ី.ប៊ី.ស៊ី (EBC) បុគ្គលឈ្មោះ ហួត សុវណ្ណ ជាប្រធានអង្គការមូលនិធិ អភិវឌ្ឍន៍អាស៊ីអាគ្នេយ៍ (AIF) និងឈ្មោះ ជិ ហ្គោសាលី ប្រធានសមាគមអ្នកប្រឹក្សាយោបល់វិនិយោគ (ICA) ទាក់ទងនឹងរឿងឆបោកលុយជាង ៦០លានដុល្លារ