ក្រសួងពាណិជ្ជកម្ម ដាក់ឲ្យប្រើប្រាស់ម៉ាស៊ីនពិសោធន៍ទំនិញដ៏ទំនើបមួយ ដើម្បីវិភាគរកជាតិគីមី និងគុណភាពម្ហូបអាហារ
ខេត្តក្រចេះ ៖ គេនៅចាំបានថា កាលពីថ្ងៃទី២៥ ខែកុម្ភៈ ឆ្នាំ២០១៦ សម្តេចតេជោ នាយករដ្ឋមន្ត្រី ហ៊ុន សែន បានថ្លែងក្នុងពិធីសម្ពោធ អគារក្រសួងបរិស្ថានថា ៖ « យើងទទួលស្គាល់ ការកាប់ព្រៃឈើនេះ គឺត្រូវតែមានទោសទណ្ឌ និងត្រូវតែបង្ក្រាបហើយ… ខ្ញុំឲ្យឧទ្ធម្ភាគចក្រពីរគ្រឿង… សៅ សុខា មិនទាន់បាញ់ ១ គ្រាប់នៅឡើយទេ។ ខ្ញុំឲ្យបាញ់…បើថាវា(ក្រុមបំផ្លាញព្រៃឈើ) ព្រហើន… រ៉ុកកែតដាក់ពីលើម្តងទៅ»។ មិនតែប៉ុណ្ណោះ សម្តេចតេជោ បានស្តីបន្ទោសថា៖ «ដឹកឈើ អាហ្នឹងដឹកឡាន… ហើយធំៗណាស់… ចុះអ្នកទៅណាអស់ ? ទាំងភ្នែកទាហាន, ទាំងភ្នែកប៉ូលីស, ទាំងភ្នែកប៉េអឹម, ទាំងភ្នែករដ្ឋបាលព្រៃឈើ, បរិស្ថាន ទៅណាអស់ហើយ ? ឬក៏អាហ្នឹង ជាមួយគេដែរ ? វាណាស់តែអ៊ីចឹង»។
ប៉ុន្តែបើទោះបី សម្តេចតេជោ នាយករដ្ឋមន្ត្រី ហ៊ុន សែន បានដាក់បញ្ជាធ្ងន់ៗ និងបានស្តីបន្ទោស មន្ត្រីៗពាក់ព័ន្ធតៗគ្នា ជាបន្តបន្ទាប់មក យ៉ាងណាក៏ដោយ ក៏គេសង្កេតឃើញថា ពួកឈ្មួញប្រព្រឹត្តបទល្មើសព្រៃឈើ នៅតែមិនខ្លាចញញើតទេ… តួយ៉ាងដូចជា មន្ត្រីយោធាម្នាក់ពាក់សក្ដិ៥ម្នាក់ ឈ្មោះពេញគឺ ថន ប៊ុនធី គេហៅក្រៅ ធី បាញ់ ដែលជាឈ្មួញដុះស្លែ ប្រចាំខេត្តក្រចេះ ល្បីខាងដឹកជញ្ជូនឈើ ទៅស្រុកយួន។ បច្ចុប្បន្ននៅតែ បន្តសកម្មភាពប្រមូលទិញឈើ និងដឹកជញ្ជូនឈើ ទៅលក់នៅស្រុកយួន ដូចមុនដដែល ដោយពុំមានមន្ត្រីជំនាញ ឬសមត្ថកិច្ចពាក់ព័ន្ធណា ចាត់វិធានការទប់ស្កាត់ឡើយ។
ប្រជាពលរដ្ឋក្នុងខេត្តក្រចេះ បានឲ្យដឹងថា មួយរយៈពេលចុងក្រោយនេះ ឈ្មួញឈើឈ្មោះ ថន ប៊ុនធី ហៅ ធីបាញ់ បានបង្កើនសកម្មភាព ដឹកជញ្ជូនឈើប្រណីត តាមរថយន្តយីឌុបធំៗ និងរថយន្តសាំយ៉ុង ជាច្រើនគ្រឿងពីខេត្តស្ទឹងត្រែង ចូលខេត្តក្រចេះ តាមផ្លូវជាតិលេខ៧ យកទៅស្រុកយួនតាមច្រកព្រំដែន ក្នុងស្រុកមេមត់ ដោយឆ្លងកាត់ មន្ត្រីរដ្ឋបាលព្រៃឈើ៣ខេត្ត គឺខេត្តស្ទឹងត្រែង ខេត្តក្រចេះ និងខេត្តត្បូងឃ្មុំ ព្រមទាំងសមត្ថកិច្ច ពាក់ព័ន្ធក្នុងខេត្តយ៉ាងរលូនបំផុត។ តាមប្រភពព័ត៌មាន បានប្រាប់ទៀតថា ក្រៅពីការរកស៊ីឈើដោយខ្លួនឯងនោះ ឥឡូវនេះទាហានសក្ដិ៥ រកស៊ីឈើដុះស្លែ ធី បាញ់ ដែលបានស្គាល់ កន្លុកកន្លៀតច្បាស់ និងស្គាល់មន្ត្រីៗពាក់ព័ន្ធកាន់តែច្រើន បាននិងកំពុងអាងស្បែក ជាមន្ត្រីយោធាមានលុយ ដោយបង្កើតមុខរបរមួយបន្ថែមទៀតគឺ គាត់ធានាប៉ាវផ្លូវ កាងឡានដឹកឈើ ប្រចាំនៅភូមិភាគឦសានតែម្ដង ឲ្យតែឈ្មួញឈើណាហ៊ានឲ្យតម្លៃថ្លៃ អាចកាត់កងទៅ បានចំណេញច្រើន ជំនួសឲ្យការដឹកឈើរបស់ខ្លួន។
កន្លងមកមានព័ត៌មានថា សកម្មភាពកាងរថយន្ត ដឹកជញ្ជូនឈើប្រណីត របស់ក្រុមទាហាន ធី បាញ់ ក៏ធ្លាប់បានប៉ះទង្គិច រហូតដល់ការផ្ទុះអាវុធជាមួយកម្លាំងសមត្ថកិច្ចចម្រុះ ដឹកនាំដោយលោក ហាក់ ហ៊ាន ព្រះរាជអាជ្ញារង អមសាលាដំបូង ខេត្តក្រចេះផងដែរ ស្ថិតក្នុងឃុំស្វាយជ្រះ ស្រុកស្នួល ខេត្តក្រចេះ បណ្តាលឱ្យគ្រាប់កាំភ្លើង ផ្លាតទៅត្រូវស្ត្រីកូនខ្ចីម្នាក់រងរបួសគួរឲ្យភ័យខ្លាច។ សកម្មភាពដឹកជញ្ចូនឈើរបស់ក្រុមទាហាន ធី បាញ់ ដែលស្ទើរក្លាយជាស្ដេចត្រាញ់ឈើ នៅខេត្តក្រចេះនោះ ក៏ត្រូវគេសង្កេតឃើញថាជារឿយៗពួកគេ តែងតែប្រើប្រាស់រថយន្តយីឌុបពី២ ទៅ៣គ្រឿង ដឹកជញ្ជូនឈើប្រណីត ចេញពីតំបន់ស្រែស្បូវ នៅចំណុចព្រំប្រទល់៣ខេត្ត គឺខេត្តស្ទឹងត្រែង, មណ្ឌលគិរី និងរតនគិរី ឆ្លងកាត់តំបន់ខ្លាស្ទុះ មកលើស្រុកស្នួល ឆ្ពោះទៅស្រុកយួន តាមច្រកជាំក្រវៀន ក្នុងស្រុកមេមត់ ខេត្តត្បូងឃ្មុំ ដែលចូលទៅដល់ ចាប់ពីចំណុចស្ពានជ្រាវ មានលោកឧកញ៉ា សឹង្ហ សំអុល ជាអ្នកម៉ៅការប៉ាវផ្លូវ នៅចាំយកលុយ ក្នុងឈើប្រណីត១ម៉ែត្រគូបពី៧០០ ទៅ៨០០ដុល្លារអាមេរិក យ៉ាងស្រួលផងដែរ។
មិនតែប៉ុណ្ណោះ កាលពីប៉ុន្មានសប្ដាហ៍មុន មានព័ត៌ថា ទាហានសក្ដិ៥ រកស៊ីឈើដុះស្លែ ធី បាញ់ បានដឹកឈើប្រណីត ចេញពីចំណុចព្រែកប្រសព្វយកទៅលក់យ៉ាងរំភើយចិត្ត ដោយឥតមានការរំខាន ពីមន្ត្រីអ្នកអនុវត្តច្បាប់សោះឡើយ។ ទាំងនេះដែលគេអាចនិយាយបានថា ប្រហែលជាលោក ធី បាញ់ ចេះមន្តអាគម បំបាំងកាយ ឬបំបាំងឡានយីឌុបធំៗ ដឹកឈើពេញៗទេ។ អ្វីដែលធ្វើឲ្យសាធារណជន កាន់តែឆ្ងល់ថែមទៀតនៅត្រង់ថា កន្លងមក សម្តេចតេជោ នាយករដ្ឋមន្ត្រី ហ៊ុន សែន បានប្រកាសព្រមានឲ្យមន្ត្រីៗសមត្ថកិច្ច ឬកងកម្លាំងប្រដាប់អាវុធគ្រប់ប្រភេទត្រូវតែដកខ្លួនចេញឲ្យឆ្ងាយ កុំឲ្យជាប់ពាក់ព័ន្ធជាមួយបទល្មើសនានាដូចជា បទល្មើសព្រៃឈើជាដើម។
អ៊ីចឹងគេសួរថា តើហេតុអីបានជាមេៗទាហានថ្នាក់លើ នៅតែបណ្ដោយឲ្យទាហានសក្ដិ៥ឈ្មោះ ថន ប៊ុនធី ហៅ ធី បាញ់ បន្តរកស៊ីដឹកឈើ ស្ទើររាល់យប់ថ្ងៃបែបនេះ ? ឬមួយក៏ពួកគាត់ខ្លះមានអាថ៌កំបាំង ឬត្រូវមន្តអាគមអី ពីមន្ត្រីទាហានសក្ដិ៥រូបនេះ ? ប្រជាពលរដ្ឋ រស់នៅខេត្តក្រចេះ បានសួរគ្នាលេងថា តិចលោដោយសារតែ ថន ប៊ុនធី ហៅ ធី បាញ់ មានឈ្មោះហៅក្រៅ ស្រដៀងគ្នានឹងឈ្មោះឯកឧត្តម ឧបនាយករដ្ឋមន្ត្រី ទៀ បាញ់ រដ្ឋមន្ត្រីក្រសួង ការពារជាតិ (មួយ ធី បាញ់… មួយទៀត ទៀ បាញ់…) ទេដឹងបានជា ទាហានសក្ដិ៥ ធី បាញ់ អាចរកស៊ីឈើ តាមអំពើចិត្តនោះ…? និងថាបើឯកឧត្តម ផ្កាយមាស៤ ទៀ បាញ់ មិនហ៊ានប៉ះពាល់ ទាហានសក្ដិ៥ ធី បាញ់ នោះទេ… ចុះឯកឧត្តម ផ្កាយមាសបួន សៅ សុខា ជា អគ្គមេបញ្ជាការង នៃកងយោធពល ខេមរភូមិន្ទ និងជាមេបញ្ជាការកងរាជអាវុធហត្ថ លើផ្ទៃប្រទេស ព្រមទាំងជាប្រធាន គណៈកម្មការជាតិ ទប់ស្កាត់ និងបង្ក្រាប បទល្មើសព្រៃឈើ ម៉េចមិនចាត់ការផងទៅ។
ពាក់ព័ន្ធនឹងបញ្ហាព្រៃឈើនេះ សម្តេចតេជោ នាយករដ្ឋមន្ត្រី ហ៊ុន សែន កាលពីថ្ងៃទី២២ ខែសីហា ឆ្នាំ២០១៦ នៅក្នុងវេទិកា ស្តីពីការការពារ និងអភិរក្ស ធនធានធម្មជាតិ នៅវិមានសន្តិភាព បានមានប្រសាសន៍ថា ៖ « យើងពិនិត្យមើលអ៊ីចេះ… យើងចាប់បាន តែអ្នករម៉ិរម៉ក់… ប៉ុន្តែអាអ្នកធំពិតប្រាកដ អាអ្នករកស៊ីពិតប្រាកដ ដែលជាម្ចាស់ ម្ចាស់នៃមធ្យោបាយ… គឺមិនដែលរកឃើញ រកមិនឃើញតាម៉ង… តើវានៅណា…? អញ្ចឹងខ្ញុំគិតថា រឿងនេះត្រូវរៀបចំនូវប្រព័ន្ធព័ត៌មានជាក់លាក់ នៃការស្រាវជ្រាវជាពិសេស ការចូលរួមរបស់ប្រជាពលរដ្ឋ… ហើយដែលក្នុងនោះ យើងក៏ត្រូវមានវិធី ដើម្បីការពារនូវអ្នកដែលផ្តល់ព័ត៌មាន ឱ្យយើងផងដែរ… តួនាទីនេះឯកឧត្តម សៅ សុខា ត្រូវបន្តទៅទៀត យុទ្ធនាការនេះ មិនអាចកាត់បន្ថយទេ… ៕ www.friendship-news.com
![]()
![]()
![]()