ឯកឧត្តមបណ្ឌិត គុណ ញឹម ខិតខំរកចំណូលគយនៅឆ្នាំ២០២៥ ប្រមូលបានជិត៣.២ពាន់លានដុល្លារ លើសផែនការរហូតដល់ ២៤%
(ភ្នំពេញ)៖ ឯកឧត្តមបណ្ឌិត គុណ ញឹម រដ្ឋមន្ដ្រីប្រតិភូអមនាយករដ្ឋមន្ដ្រី អគ្គនាយកនៃអគ្គនាយកដ្ឋានគយ និងរដ្ឋាករកម្ពុជា បានបញ្ជាក់ច្បាស់ឲ្យដឹងថា ចំណូលគយដែលប្រមូលបាន នៅក្នុងឆ្នាំ២០២៥នេះ បានជិត ៣.២ពាន់លានដុល្លារ លើសពីផែនការរហូតដល់ ២៤ភាគរយ ២៤%ដែលជាចំនួនមួយខ្ពស់ស្មើនឹងឆ្នាំ២០១៩។
ការបញ្ជាក់បែបនេះ ធ្វើឡើងក្នុងឱកាសដែល ឯកឧត្តមបណ្ឌិត គុណ ញឹម អញ្ជើញជាអធិបតីភាព ក្នុងវេទិកាផ្សព្វផ្សាយ និងដាក់ឲ្យអនុវត្ដផែនការសកម្មភាព ឆ្នាំ២០២៦ របស់អគ្គនាយកដ្ឋានគយ និងរដ្ឋាករកម្ពុជា។ វេទិកានេះ ធ្វើឡើងនៅសាលសន្និសីទ នៃសាលាជាតិគយ នាព្រឹកថ្ងៃទី២៧ ខែមករា ឆ្នាំ២០២៦។
ឯកឧត្តមបណ្ឌិត គុណ ញឹម បានបញ្ជាក់យ៉ាងដូច្នេះថា «ឆ្នាំ២០២៥ អ្វីដែលយើងអនុវត្ដបាន គឺបានលើសផែនការ រហូតដល់២៤.៥ភាគរយ ជាតួលេខមួយខ្ពស់ បើប្រៀបធៀបជាមួយនឹងផែនការដែលមានការកើនឡើងដល់ស្មើឆ្នាំ២០១៩ ដែលជាតួរលេខមួយខ្ពស់»។
បន្ថែមពីនោះទៀត ឯកឧត្តមបណ្ឌិត គុណ ញឹម បានលើកឡើងថា តួលេខទឹកប្រាក់ពន្ធអាករ ដែលប្រមូលបានដោយអគ្គនាយកដ្ឋានគយ និងរដ្ឋាករកម្ពុជា នៅឆ្នាំ២០២៥ វាឡើងប្រហាក់ប្រហែលនឹងឆ្នាំ២០១៩ ដែលជាឆ្នាំមួយ មានសេដ្ឋកិច្ចល្អ ទាំងការវិនិយោគ និងពាណិជ្ជកម្ម។
សូមជម្រាបផងដែរថា នៅក្នុងច្បាប់ថវិកា កាលពីឆ្នាំ២០១៩ កំណត់ឲ្យអគ្គនាយកដ្ឋានគយ និងរដ្ឋាករកម្ពុជា ប្រមូលចំណូលឲ្យបាន ២,២៦០លានដុល្លារ ប៉ុន្តែគយបានរកចំណូលលើសច្បាប់ថវិការហូតដល់ជាង៩០០លានដុល្លារ ដែលសរុបជិត ៣.២ពាន់លានដុល្លារ៕www.cafj.net
