(ខេត្តសៀមរាប)៖ អ្នកឧកញ៉ា ឧត្តមមង្គលសោភណ័គ្រី ទូច និងលោកជំទាវទ្រី ង៉ូវណាំ ឯកឧត្តម ជិត គន្ធុល និងលោកជំទាវគ្រី វួចឈង ព្រមទាំងក្រុមគ្រួសារ បង ប្អូន កូនក្មួយ និងសប្បុរសជន នៅថ្ងៃទី២ ខែសីហា ឆ្នាំ២០២៥ បានអញ្ជើញចុះសួរសុខទុក្ខ និងចែកអំណោយជូនបងប្អូនប្រជាពលរដ្ឋភៀសសឹក ដែលបានជម្លៀសចេញពីជម្លោះព្រំដែនកម្ពុជា ថៃមកស្នាក់នៅបណ្តោះអាសន្ន ទីសុវត្តិភាពនៅក្នុងភូមិអភិវឌ្ឍន៍(វត្តអូរតាកុក) ឃុំកន្តួត ស្រុកស្វាយលើ ខេត្តសៀមរាប ដោយមានការចូលរួមពីសំណាក់លោក អភិបាលស្រុកស្វាយលើ អៀង ពិសិដ្ឋ មន្រ្តីរាជការ កងកម្លាំង និងអជ្ញារធរគ្រប់លំដាប់ថ្នាក់ ។

លោកអភិបាលស្រុក អៀង ពិសិដ្ឋ បានធ្វើរបាយការណ៍បញ្ជាក់ថា ប្រជាពលរដ្ឋភៀសសឹក ដែលកំពុងស្នាក់នៅក្នុងភូមិអភិវឌ្ឍន៍ មានចំនួន ៦៧៥គ្រួសារ នៅព្រឹកថ្ងៃទី២ ខែសីហា ឆ្នាំ២០២៥នេះ។

ឯកឧត្តម ជិត គន្ធុល តំណាងអ្នកឧកញ៉ាឧត្តមមង្គលសោភ័ណគ្រី ទូច បានថ្លែងថា ឈរលើស្មារតីរួមគ្នាជាធ្លុងមួយ សាមគ្គីភាព ឯកភាពជាតិខ្មែរ និងក្នុងស្មារតីចែករំលែក ខ្មែរស្រលាញ់ខ្មែរ ខ្មែរជួយខ្មែរ, ថ្ងៃនេះ ឯកឧត្តម និងក្រុមគ្រួសារ ព្រមទាំងសប្បុរសជនបានមកជួបសាកសួរសុខទុក្ខបងប្អូនភៀសសឹក ដែលកំពុងស្នាក់នៅបណ្តោះអាសន្នស្រុកស្វាយ លើខេត្តសៀមរាប ហើយកំពុងជួបការលំបាកនិងទុក្ខសោក ដោយសារការឈ្លានពានពីកងទ័ពថៃមកលើទឹកដីកម្ពុជានៅតាមបណ្តោយព្រំដែនកម្ពុជា-ថៃ។

លោកបានពាំនាំនូវបណ្តាំផ្ញើសាកសួរសុខទុក្ខពីសំណាក់សម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាពិសេសពីសំណាក់សម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ដែលតែងតែបានគិតគូរជានិច្ច ពីសុខទុក្ខនិងជីវភាពរស់នៅរបស់បងប្អូនទាំងអស់ដែលជាជនភៀសសឹក ក៏ដូចវីរយុទ្ធជនពលី និងរងរបួស នៅគ្រប់ទីកន្លែង និយាយជារួម និងនិយាយដោយឡែក នៅក្នុងខេត្តសៀមរាបរបស់យើងផងដែរ។ 

ក្នុងឱកាសនោះដែរ ឯកឧត្តម ជិត គន្ធុល ក៏បានថ្លែងអំណរគុណនិងវាយតម្លៃខ្ពស់ចំពោះអភិបាល ស្រុក មេឃុំ មេភូមិ និងអាជ្ញាធរពាក់ព័ន្ធទាំងអស់ ដែលបានយកចិត្តទុកដាក់ដល់សុខទុក្ខរបស់បងប្អូនភៀសសឹកក្នុងពេលដ៏លំបាកនេះ និងសូមឱ្យអាជ្ញាធរមូលដ្ឋានគ្រប់លំដាប់ថ្នាក់ ត្រូវបន្តយកចិត្តទុកដាក់ឱ្យបានខ្ពស់បំផុតចំពោះសុខទុក្ខ និងផលលំបាកនានារបស់បងប្អូន រហូតបងប្អូនអាចវិលត្រឡប់ទៅលំនៅឋានរៀងៗខ្លួនវិញ។ ជាមួយគ្នានេះសូមបងប្អូនបន្តរក្សាភាពអត់ធ្មត់ ស៊ូទ្រាំ និងថែរក្សាសុខភាពឱ្យបានល្អ រហូតដល់ស្ថានការណ៍វិលត្រលប់ទៅធម្មតាឡើងវិញ។ 

ឯកឧត្តម ជិត គន្ធុលបានលើកឡើងថា ក្នុងកាលៈទេសៈនេះ បងប្អូនកំពុងជួបប្រទះនូវការលំបាក ដោយត្រូវចាកចោលផ្ទះសម្បែង ភូមិឋាន ទ្រព្យសម្បត្តិ មុខរបរ និងអាជីវកម្មផ្សេងៗ។ ប៉ុន្តែការលំបាកនិងទុក្ខសោករបស់បងប្អូន ក៏គឺជាទុក្ខសោកនិងការលំបាករបស់រាជរដ្ឋាភិបាល ក៏ដូចជារបស់ជាតិខ្មែរយើងទាំងអស់គ្នា ក្នុងស្មារតីជាប្រជាជាតិតែមួយ។ 

ដូច្នេះសូមអ្នកទាំងអស់គ្នាជឿទុកចិត្ត និងបន្តគាំទ្រដល់វីរយុទ្ធជនរបស់យើង ដែលបានលះបង់សាច់ស្រស់ ឈាមស្រស់ លះបង់ជីវិត ដើម្បីការពារបូរណភាពទឹកដី មាតុភូមិនៃយើង និងសូមបន្តរួមគ្នាចែករំលែក រែកពុននូវទុក្ខសោកនិងការលំបាកទាំងនេះទាំងអស់គ្នា និងរួមគ្នាប្រឹងប្រែង តស៊ូ លះបង់ បន្តពង្រឹងនិងលើកកម្ពស់សមត្ថភាព ដើម្បីប្រែក្លាយការលំបាកនិងទុក្ខសោកនេះ ឱ្យក្លាយទៅជាចលនាជាតិ ចលនារួបរួមជាតិ ឯកភាពជាតិ ដើម្បីអាចម្ចាស់ការការពារជាតិ និងកសាងជាតិខ្មែរយើងឱ្យខ្លាំងពូកែ រឹងមាំ និងមានស្ថិរភាព ព្រមទាំងជំរុញដល់ការអភិវឌ្ឍប្រទេសឱ្យរីកចម្រើនជឿនលឿនជានិរន្តរ៍។

លោកក៏បានគូសបញ្ជាក់អំពីគុណតម្លៃនៃ «សន្តិភាព» ដែលយើងទាំងអស់គ្នាត្រូវចូលរួមការពារនិងរក្សាឱ្យបានក្នុងគ្រប់កាលៈទេសៈ ដើម្បីជាគុណប្រយោជន៍ដល់ជីវភាពរស់នៅរបស់យើងផ្ទាល់ ក្រុមគ្រួសារយើងផ្ទាល់ និងជាមូលដ្ឋានមិនអាចខ្វះបានក្នុងការអភិវឌ្ឍជាតិ និងការកសាងជាតិរបស់យើង ក្នុងរយៈពេលវែង។ ក្នុងន័យនេះ សូមបងប្អូនប្រជាពលរដ្ឋទាំងអស់ ផ្តល់ជំនឿទុកចិត្តទៅលើសមត្ថភាពដឹកនាំ និងសមត្ថភាពដោះស្រាយបញ្ហារបស់ប្រមុខរាជរដ្ឋាភិបាលរបស់យើង គឺ សម្ដេចមហាបវរធិបតី ហ៊ុន ម៉ាណែត ដោយមានការជ្រោមជ្រែងពេញទំហឹងពី សម្ដេចអគ្គមហាសេនាបតីតេជោ ហ៊ុន សែន ដែលកំពុងខិតខំធ្វើការមិនថាយប់ មិនថាថ្ងៃ ដើម្បីស្វែងរកមកវិញនូវ សន្តិភាពជូនបងប្អូន និងការពារបាននូវអធិបតេយ្យភាព បូរណភាពទឹកដីរបស់យើង ដោយសន្តិវិធី តាមរយៈនយោបាយការទូត និងឈរលើគោលការណ៍ច្បាប់ ជាមួយនឹងភាគីពាក់ព័ន្ធទាំងអស់ ទាំងសហរដ្ឋអាមេរិក សាធារណរដ្ឋប្រជាមានិតចិន និងទាំងបណ្ដាប្រទេសអាស៊ាន។ 

ក្នុងស្មារតីរួមគ្នាជាធ្លុងមួយ និងដើម្បីសម្រាលការលំបាករបស់បងប្អូនភៀសសឹក ក្នុងពេលដ៏លំបាកនេះ ឯកឧត្តម ជិត គន្ធុល តំណាងអ្នកឧកញ៉ា ឧត្តមមង្គលសោភណ័ គ្រី ទូច ដែលត្រូវជាឪពុកក្មេក បានពាំនាំនូវអំណោយសម្រាប់ចែកជូនដល់បងប្អូនប្រជាជនភៀសសឹកសរុបចំនួន ៦៧៥គ្រួសារ ដោយរួមមាន៖ សម្ភារៈចំនួន ៧០០កញ្ចប់ ក្នុងនោះរួមមានកន្ទេល ១ , មុង ១, កន្សែង ១, ខ្នើយ ១, ក្រម៉ា ១, សាប៊ូរម្សៅ ១កញ្ចប់, សាប៊ូដុំ ៣ដុំ, ត្រីខកំប៉ុង ១យួរ និងនុំបាយក្តាំង ១កញ្ចប់។ 

ទឹកដោះគោសម្រាប់ក្មេង ចំនួន២០កេសតូច, សាច់ជ្រូកចំនួន ៥០០គីឡូ, សារ៉ុងចំនួន ៤០០, ផ្អកចំនួន ២០០កែវ, អំបុក ចំនួន ៥០០គីឡូ, នុំពងទា ចំនួន ២៥០ប្រអប់, សម្ភារៈដែលបានជូនប្រជាពលរដ្ឋភៀសសឹកសរុបជាថវិកាចំណាយអស់២២,០០០ដុល្លារអាមេរិក)។

ក្នុងនោះក៏មានប្រគល់ជូនថវិការចំនួន ៩២៥ដុល្លារដល់រដ្ឋបាលស្រុកដើម្បីចាត់ចែងដល់ក្រុមការងារដែលជួយសម្របសម្រួលពលរដ្ឋភៀសសឹក។

នៅក្នុងឱកាសដែលចុះសាកសួរសុខទុក្ខ និងចែកអំណោយដល់ប្រជាពលរដ្ឋភៀសសឹកក្នុងស្រុកស្វាយលើ នេះដែរ ឯកឧត្តម ជិត គន្ធុល និងលោកជំទាវ គ្រី វួច ឈង បាននាំយកថវិកាចំនួន ១៦,០០០ដុល្លារអាមេរិក ជូនដល់ លោក ប្រាក់ សោភណ័ អភិបាល នៃគណៈអភិបានខេត្តសៀមរាប ក្នុងនោះថវិកាចំនួន ១០,០០០ដុល្លារ(ថវិកាអ្នកឧកញ៉ា ឧត្តមមង្គលសោភណ័គ្រី ទូច និងលោកជំទាវទ្រី ង៉ូវណាំ ព្រមទាំងក្រុមគ្រួសារ) សម្រាប់សាលាខេត្តបន្តនិរន្តរភាពផ្គត់ផ្គង់ជួយដល់ប្រជាពលរដ្ឋភៀសសឹកនិង៦,០០០ដុល្លារ (ថវិកា ឯកឧត្តមនួន សំបូរ និងលោកជំទាវកៅ ចំរើន ព្រមទាំងក្រុមគ្រួសារ)សំរាប់ជួយដល់គ្រួសារវិរយុទ្ធជនដែលបានពលីជីវិតដោយសារសង្គ្រាមឈ្លានពានរបស់ពួកកងទព័ថៃ។

នៅក្នុងឱកាសជួបសំណេះសំណាល និងទទួលថវិកាចំនួន ១៦,០០០ដុល្លារ លោក ប្រាក់ សោភណ័អភិបាល នៃគណៈអភិបាលខេត្តសៀមរាបក៏បានផ្តាំផ្ញើរនិងសាកសួរសុខទុក្ខដល់អ្នកឧកញ៉ា ឧត្តមមង្គលសោភណ័ គ្រី ទូច និងលោកជំទាវ ទ្រី ង៉ូវណាំ ព្រមទាំងក្រុមគ្រួសារ និង ឯកឧត្តម ជិត គន្ធុល និងលោកជំទាវ គ្រី វួច ឈងសូមបួងសួងដល់វត្ថុស័ក្តិសិទ្ធិក្នុងលោក គុណបុណ្យព្រះរតនត្រ័យកែវទាំងបី សូមប្រសិទ្ធិពរជ័យ សិរីមង្គល វិបុលសុខ មហាប្រសើរជូន ក្រុមគ្រួសារ សូមមានសុខភាពល្អបរិបូរណ៍ កម្លាំងពលំមាំមួន ប្រាជ្ញាឈ្លាសវៃ និងជួបប្រទះតែនឹងពុទ្ធពរទាំ ៤ ប្រការ គឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ៕

is