តាមប្រភពបានឲ្យដឹងថា កាលពីអំឡុងថ្ងៃទី២៧ ខែកញ្ញា ឆ្នាំ២០២១ កន្លងទៅ រាជរដ្ឋាភិបាលកម្ពុជា នីតិកាលទី៦ នៃរដ្ឋសភា ធ្លាប់បានសម្រេចកាត់ផ្ទៃដីទំហំ ១៥៥ហិកតា ស្ថិតនៅសង្កាត់គោករកា ខណ្ឌព្រែកព្នៅ រាជធានីភ្នំពេញ ចេញពីផ្ទៃបឹងតាមោក (បឹងកប់ស្រូវ) ធ្វើអនុប្បយោគជាដីឯកជនរបស់រដ្ឋ និងធ្វើប្រទានកម្មជាកម្មសិទ្ធិ ជូនរដ្ឋបាលរាជធានីភ្នំពេញ (៥៥ហិកតា) និងជូនក្រសួងសុខាភិបាល  ​(១០០ហិកតា) ដោយអនុក្រឹត្យលេខ ១៨៨អនក្រ.បក និងអនុក្រឹត្យលេខ ១៨៩អនក្រ.បក ។

រំលងពេលប្រមាណជិត២ខែក្រោយមក រាជរដ្ឋាភិបាលកម្ពុជា នីតិកាលទី៦ នៃរដ្ឋសភា បានសម្រេចនិរាករណ៍អនុក្រឹត្យលេខ ១៨៨អនក្រ.បក និងអនុក្រឹត្យលេខ ១៨៩អនក្រ.បក ចុះថ្ងៃទី២៧ ខែកញ្ញា ឆ្នាំ២០២១ ដែលកាត់ចំណែកផ្ទៃដីបឹងតាមោក (បឹងកប់ស្រូវ) ធ្វើអនុប្បយោគជាដីឯកជនរបស់រដ្ឋ និងធ្វើប្រទានកម្មជាកម្មសិទ្ធិ ជូនរដ្ឋបាលរាជធានីភ្នំពេញ និងជូនក្រសួងសុខាភិបាល នោះចោលវិញ ដោយអនុក្រឹត្យលេខ ២៣១អនក្រ.បក ចុះថ្ងៃទី១៧ ខែវិច្ឆិកា ឆ្នាំ២០២១ ខណៈដំណាលគ្នានេះ រាជរដ្ឋាភិបាលកម្ពុជា ក៏បានសម្រេចកាត់ផ្ទៃដីទំហំ ១ ៥៥៣ ៨៣២ម៉ែត្រក្រឡា (ឬជាង១៥៥ហិកតា) ស្ថិតនៅសង្កាត់គោករកា ខណ្ឌព្រែកព្នៅ រាជធានីភ្នំពេញ ចេញពីផ្ទៃបឹងតាមោក (បឹងកប់ស្រូវ) ធ្វើអនុប្បយោគពីទ្រព្យសម្បត្តិសាធារណៈរបស់រដ្ឋ ទៅជាទ្រព្យសម្បត្តិឯកជនរបស់រដ្ឋ និងធ្វើប្រទានកម្មជាកម្មសិទ្ធិ ជូនលោក កុក អាន ដោយពន្ធ និងអាករផ្សេងៗ ជាបន្ទុករបស់រដ្ឋ (Sic!) ។

អនុលោមតាមដំណើររឿងហេតុខាងលើនេះ មជ្ឈដ្ឋានអ្នកតាមដាន និងអ្នកវិភាគកិច្ចការសង្គមនៅកម្ពុជា បានលើកជាសំណួរថា តើចំណែកដីជាកម្មសីទ្ធិរបស់រដ្ឋបាលរាជធានីភ្នំពេញ និងក្រសួងសុខាភិបាល ទំហំ១៥៥ហិកតា ដែលទទួលបានពីការកាត់ចេញពីផ្ទៃបឹងតាមោក និងធ្វើអនុប្បយោគជាដីឯកជនរបស់រដ្ឋ នោះ បានលក់ផ្ទេរសិទ្ធិ ឬដោះដូរផ្ដាច់ឱ្យទៅលោក កុក អាន ធ្វើជាកម្មសិទ្ធិឯកជនទាំងស្រុង (ថែមផ្ទៃដីទំហំ ៣ ៨៣២ម៉ែត្រក្រឡា ទៀត)​ ដោយពន្ធ និងអាករផ្សេងៗ ជាបន្ទុករបស់រដ្ឋ រួចហើយមែនឬ  (Resic!) ?

គួរបញ្ជាក់ជូនថា លោក កុក អាន គឺជាអ្នកជំនួញចាស់វស្សា ១រូប (ម្ចាស់ក្រុមហ៊ុន ANCO BROTHER និងក្រុមហ៊ុនជាច្រើនទៀត រួមទាំងមានបនល្បែងកាស៊ីណូ ផង) ជាគោរមវន្ដអ្នកឧកញ៉ា (ឧកញ៉ា កុក អាន ទទួលបានការត្រាស់បង្គាប់ផ្ដល់គោរមងារជា អ្នកឧកញ៉ា ដោយព្រះរាជក្រឹត្យលេខ នស/រកត/០៨២៣/១៩៤០ ចុះថ្ងៃទី១៨ ខែសីហា ឆ្នាំ២០២៣) ជាអនុប្រធានសមាគមឧកញ៉ាកម្ពុជា និងជាសមាជិកព្រឹទ្ធសភា នៃព្រះរាជាណាចក្រកម្ពុជា មកពីគណបក្សប្រជាជនកម្ពុជា (CPP) មានឋានៈជា «ឯកឧត្តម» បានជាប់ឈ្មោះជា បុគ្គលលំដាប់លេខរៀងទី៦១ ដែលមានភ័ព្វសំណាងទទួលបានចំណែកផ្ទៃដីបឹងតាមោក (បឹងកប់ស្រូវ) នៅរាជធានីភ្នំពេញ ទំហំជាង១៥៥ហិកតា ធ្វើជាកម្មសិទ្ធិឯកជន ដោយអនុក្រឹត្យរបស់រាជរដ្ឋាភិបាលកម្ពុជា នីតិកាលទី៦ នៃរដ្ឋសភា ៕សូមអានភាគទី២បន្ត