ងៃទី១០ ខែកញ្ញា ឆ្នាំ២០២៤

នារសៀល ថ្ងៃចន្ទ ៧ កើត ខែភទ្របទ ឆ្នាំរោង ឆស័ក ព.ស ២៥៦៨ ត្រូវនឹងថ្ងៃទី៩ ខែកញ្ញាឆ្នាំ២០២៤ នៅសាលាជាតិគយ មានរៀបចំសិក្ខាសាលា របស់អង្គការគយពិភពលោកស្តីពីតម្លៃគិតពន្ធគយ ក្រោម អធិបតីភាព របស់ លោក ផា អេងវ៉េង អគ្គនាយករង នៃអគ្គនាយកដ្ឋានគយនិងរដ្ឋាករកម្ពុជា តំណាងដ៏ខ្ពង់ខ្ពស់ ឯកឧត្តមបណ្ឌិត គុណ ញឹម រដ្ឋមន្ត្រីប្រតិភូអមនាយករដ្ឋមន្ត្រីអគ្គនាយក នៃអគ្គនាយកដ្ឋានគយនិងរដ្ឋាករកម្ពុជា ដោយមានការចូលរួមពីជំនាញការមកពីអង្គការគយពិភពលោក ដើម្បីធ្វើបទបង្ហាញដល់សិក្ខាកាមជាមន្រ្តីតម្លៃគិតពន្ធគយ មកពីបណ្តានាយកដ្ឋាន សាខា និងការិយាល័យគយនិងរដ្ឋាករសំខាន់ៗ ក្រោមឱវាទអគ្គនាយកដ្ឋានគយនិងរដ្ឋាករកម្ពុជា ចំនួន ៥០ រូប។

សិក្ខាសាលានេះនឹងប្រព្រឹត្តទៅរយៈពេល ០៥ ថ្ងៃ ចាប់ពីថ្ងៃទី៩ ដល់ថ្ងៃទី១៣ ខែកញ្ញា ឆ្នាំ២០២៤ដែលរៀបចំឡើងដោយ អគ្គនាយកដ្ឋានគយនិងរដ្ឋាករកម្ពុជា សហការជាមួយអង្គការគយពិភពលោក ដោយអនុ លោម តាមផែនការសកម្មភាពប្រចាំឆ្នាំ២០២៤ និងយុទ្ធសាស្ត្រកែទម្រង់និងទំនើបកម្មគយឆ្នាំ ២០២៤-២០២៨ ក្នុងគោលបំណងលើកកម្ពស់សមត្ថភាព និងចំណេះដឹងរបស់មន្រ្តីគយនិងរដ្ឋាករកម្ពុជា លើជំនាញតម្លៃគិតពន្ធគយឱ្យកាន់តែមានលក្ខណៈស៊ីជម្រៅ ដោយផ្តោតសំខាន់លើកិច្ចព្រមព្រៀងស្តីពីតម្លៃគិតពន្ធគយនៃអង្គការពាណិជ្ជកម្មពិភពលោក (WTO) ជាពិសេសពាក់ព័ន្ធនឹងថ្លៃផ្ទេរ (Transfer Pricing) និងករណីស្មុគ្រស្មាញផ្សេងទៀតពាក់ព័ន្ធនឹងតម្លៃគិតពន្ធគយ។

ថ្លែងក្នុងសុន្ទរកថាបើកកម្មវិធី លោកអគ្គនាយករង ផា អេងវ៉េង បានគូសបញ្ជាក់ថា បន្ថែមលើកាតព្វកិច្ច ក្នុងការពារសុខសុវត្ថិភាពសង្គម ការប្រមូលចំណូល នៅតែជាបេសកកម្មដ៏សំខាន់របស់អគ្គនាយកដ្ឋានគយនិងរដ្ឋាករកម្ពុជា ដោយសារចំណូលដែល ប្រមូលដោយគយបានចូលរួមចំណែកដ៏សំខាន់ដល់ថវិកាជាតិ។ អគ្គនាយកដ្ឋានគយនិងរដ្ឋាករកម្ពុជា ប្តេជ្ញានឹងបន្តក្នុងការធ្វើទំនើបកម្មបន្ថែមទៀត និងបំពេញតួនាទីជាអ្នកផ្តល់សេវាកម្មប្រកបដោយ ការទទួលខុសត្រូវខ្ពស់ស្របតាមស្តង់ដារវិជ្ជាជីវៈ និងសង្គតិភាពជាមួយការអនុវត្តន៍ល្អជាលក្ខណៈអន្តរជាតិ ដើម្បីធានាបាននូវប្រសិទ្ធភាពនៃការប្រមូលចំណូល និងកិច្ចពាណិជ្ជកម្មអន្តរជាតិ។

ជា ចុងបញ្ចប់ លោកអគ្គនាយក រង ក៏បានផ្តាំផ្ញើឱ្យសិក្ខាកាមទាំងអស់ចូលរួមយ៉ាងសកម្មក្នុង ការពិភាក្សា និង ផ្លាស់ប្តូរ មតិយោបល់ ដើម្បីក្រេបជញ្ជក់យកនូវ ចំណេះដឹងល្អៗ បន្ថែមទៀតពីជំនាញការ មកពីអង្គការ គយពិភពលោក។ សិក្ខាសាលានេះនឹងជួយលើកកម្ពស់ការយល់ដឹងរបស់មន្ត្រីគយនិងរដ្ឋាករដែលជាសិក្ខាកាម លើការងារតម្លៃគិតពន្ធគយ ដែលជាការចូលរួមចំណែកក្នុងការបង្កើនប្រសិទ្ធភាពនៃការងារប្រមូលចំណូល ក៏ដូចជាអនុវត្តបានត្រឹមត្រូវស្របតាមកិច្ចព្រមព្រៀងដែលប្រទេសកម្ពុជាជាសមាជិក។