បន្ទាប់ពីបាត់លុយវិនិយោគរាប់សិបលានដុល្លាអ្នកវិនិយោគក្នុងក្រុមហ៊ុន CIC Partner ទាមទារឱ្យថ្នាក់ដឹកនាំទាំង ១៣នាក់សងលុយពួកគេវិញ !
តាមប្រភពសមាជិករងគ្រោះពីការផ្តល់ប្រាក់កម្ចីដើម្បីទទួលបានការប្រាក់ក្នុងក្រុមហ៊ុន CIC Partner ទាមទារឱ្យអ្នកគ្រប់គ្រងជាន់ខ្ពស់ទាំង ១៣នាក់របស់ក្រុមហ៊ុននេះ សងលុយពួកគេវិញ។
ទោះជាយ៉ាងណាក៏ដោយ ក្រុមអ្នកវិនិយោគដែលដាក់លុយរកស៊ីនៅក្នុងក្រុមហ៊ុននេះអះអាងថាបុរសម្នាក់ដែលគេស្គាល់ថាជាប្រធានក្រុមប្រឹក្សាភិបាលនៃក្រុមហ៊ុនជិត ២០ មានរចនាសម្ព័ន្ធដូចជាសម្បុកពីងពាង និងជាថៅកែហាង ផាកកាហ្វេ (Park Café) គឺលោក គុយ វ៉ាត បានធ្វើឲ្យបាត់លុយរាប់សិបលានដុល្លារ ដែលជាលុយវិនិយោគនៅក្នុងក្រុមហ៊ុន។ ពួកគេនិយាយថា លោកគុយ វ៉ាត នៅមិនទាន់ចេញមុខធ្វើការបកស្រាយអំពីការបាត់លុយទាំងនោះនៅឡើយទេ ហើយថាសមត្ថកិច្ចក៏មិនទាន់បើកការស៊ើបអង្កេតលើបញ្ហាទាំងនេះដែរ។
សមាជិករងគ្រោះពីការឲ្យប្រាក់ខ្ចីដើម្បីទទួលបានការប្រាក់ ទាមទារឱ្យអ្នកគ្រប់គ្រងជាន់ខ្ពស់ក្នុងក្រុមហ៊ុន ខេមបូឌាន អ៊ីនវេស្ទ័រ ឃែបភីថល ផាតនឺ (Cambodian Investor Capital Partner) ហៅកាត់ថា CIC Partner ទាំង ១៣នាក់ ដូចជាលោក គុយ វ៉ាត ដែលជាម្ចាស់ហាង Park Café លោក សោម សម្បត្តិ និងលោក គីម សុខហេង ជាដើម សងប្រាក់ទៅពួកគេវិញ បន្ទាប់ពីក្រុមហ៊ុននេះផ្អាកបង់ការប្រាក់ឱ្យពួកគេអស់រយៈពេលជិត ១ឆ្នាំមក។
ពលរដ្ឋជាច្រើននាក់ដែលអះអាងថាខ្លួនជាសមាជិករងគ្រោះពីការផ្តល់ប្រាក់ខ្ចីដើម្បីស៊ីការប្រាក់ខ្ពស់ពីក្រុមហ៊ុនមូលនិធិ CIC Partner បានទម្លាយប្រាប់សារព័ត៌មាន ក្នុងលក្ខខណ្ឌមិនបញ្ចេញឈ្មោះថា ជនរងគ្រោះដែលបានឱ្យក្រុមហ៊ុនមូលនិធិ CIC Partner ខ្ចីប្រាក់ដើម្បីទទួលបានការប្រាក់មកវិញ កំពុងទាមទារឱ្យក្រុមហ៊ុនដោះស្រាយប្រាក់ដែលពួកគេបានដាក់វិនិយោគទៅក្នុងក្រុមហ៊ុនកន្លងមក ដែលមានទំហំទឹកប្រាក់រាប់ម៉ឺនដុល្លារ រាប់សែនដុល្លារសហរដ្ឋអាមេរិកក្នុងម្នាក់ៗ បន្ទាប់ពីក្រុមហ៊ុននេះឈប់ផ្តល់ការប្រាក់ប្រចាំខែឱ្យពួកគេចាប់តាំងពីខែឧសភា ឆ្នាំ២០២៣មក។
ជនរងគ្រោះទាំងនោះបានរៀបរាប់ថា ប្រាក់ដែលពួកគេបានផ្តល់ទៅឱ្យក្រុមហ៊ុននេះខ្ចី គឺមានមេក្រុមជាអ្នកប្រមូល ក្នុងនោះក៏មានគ្រូជោគជ័យឈ្មោះ គីម សុខហេង និងលោក សោម សម្បត្តិដែរ។
ប្រភពដដែលបន្តថា គ្រាន់តែលោក គីម សុខហេង ម្នាក់ អាចប្រមូលលុយពីកូនសិស្សដែលជឿជាក់លើគាត់តាមរយៈនៃការបង្រៀនវគ្គជោគជ័យ បានប្រមាណជា ៧លានដុល្លារសហរដ្ឋអាមេរិកឯណោះ ដើម្បីបណ្ដាក់ទុននៅក្នុងក្រុមហ៊ុននេះ ហើយម្ចាស់ប្រាក់ម្នាក់ៗសុទ្ធតែសង្ឃឹមថានឹងទទួលបានការប្រាក់ប្រចាំខែត្រឡប់ទៅវិញ៕នៅមានតភាគទី២
