(ភ្នំពេញ)៖ នៅឆមាសទី១ ឆ្នាំ២០២៣នេះ កម្ពុជាទទួលបានចំណូលពីវិស័យល្បែងពាណិជ្ជកម្មបានប្រមាណ ១២លានដុល្លារអាមេរិក កើនឡើងជិត១៦% បើធៀបនឹងរយៈពេលដូចគ្នាកាលពីឆ្នាំ២០២២។

លោក រស់ ភីរុណ អគ្គលេខាធិការនៃគណៈកម្មការគ្រប់គ្រងល្បែងពាណិជ្ជកម្មកម្ពុជា បានប្រាប់បណ្តាញព័ត៌មានថា ការប្រមូលចំណូលពីវិស័យល្បែងពាណិជ្ជកម្ម នៅមានចំនួនទាប និងមានភាពយឺតយ៉ាវនៅឡើយ ពោល គឺការប្រមូលចំណូលរយៈពេល ៦ខែដើមឆ្នាំនេះ បានតែ២៩.៦% នៃច្បាប់ថវិកាជាតិតែប៉ុណ្ណោះ ដោយច្បាប់នេះ បានកំណត់ឱ្យវិស័យល្បែងពាណិជ្ជកម្ម ត្រូវប្រមូលចំណូលឱ្យបានជាង ៤២លានដុល្លារ នៅឆ្នាំនេះ។

លោកសង្ឃឹមថា នៅឆមាសទី២ ឆ្នាំ២០២៣ ការប្រមូលចំណូលពីវិស័យល្បែងពាណិជ្ជកម្មនឹងកើនឡើង ក្រោយការហូរចូលនៃភ្ញៀវទេសចរអន្តរជាតិ។

លោកបានឱ្យដឹងថា វិស័យល្បែងពាណិជ្ជកម្ម បានបាត់បង់ចំណូលស្ទើរតែទាំងស្រុង នៅអំឡុងពេលរីករាលដាលនៃជំងឺកូវីដ១៩ និងបានចាប់ផ្តើមងើបឡើងវិញបន្តិចៗម្តង ដែលលោកព្យាករណ៍ថា វិស័យនេះនឹងមានសន្ទុះល្អឡើងវិញ នៅក្រោយឆ្នាំ២០២៤ បន្ទាប់ពីកម្ពុជាបានអនុវត្តច្បាប់ ស្តីពីការគ្រងគ្រប់វិស័យល្បែងពាណិជ្ជកម្ម បានរឹងមាំ ដែលនឹងធ្វើឱ្យការបង់ចំណូលកើនឡើង។

លោក រស់ ភីរុណ បានឱ្យដឹងផងដែរថា បច្ចុប្បន្ននេះ រាជរដ្ឋាភិបាលបានផ្តល់អាជ្ញាបណ្ណដល់ក្រុមហ៊ុនក្នុងវិស័យល្បែងពាណិជ្ជកម្មចំនួន ១៨១កាស៉ីណូ ក្នុងនោះអាជ្ញាបណ្ណ បន្តសុពលភាពធ្វើអាជីវកម្ម ដែល បានបំពេញលក្ខខណ្ឌពេញលេញចំនួន ៨៧, ការបន្តសុពលភាពអាជ្ញាបណ្ណដែលមិនទាន់បានបំពេញលក្ខខណ្ឌ ពេញលេញ ឬអាជ្ញាបណ្ណបណ្តោះអាសន្នចំនួន ៩១ និងអាជ្ញាបណ្ណថ្មី ដែលផ្តល់ដល់អ្នកដែលទើបចាប់ផ្តើមអាជីវកម្មថ្មី មានចំនួន៣។

បច្ចុប្បន្ននេះរាជរដ្ឋាភិបាល បានផ្តល់អាជ្ញាបណ្ណ និងអនុញ្ញាតឱ្យដំណើរការល្បែងតែពីរប្រភេទប៉ុណ្ណោះ រួមមានកាស៊ីណូ និងល្បែងផ្សងសំណាង។ ដោយឡែកសម្រាប់ល្បែងលេងតាមប្រព័ន្ធអេឡិចត្រូនិក គឺរាជរដ្ឋាភិបាលពុំមានការផ្តល់អាជ្ញាបណ្ណ ឬអនុញ្ញាតឱ្យដំណើរការនៅកម្ពុជានោះឡើយ៕