ប្រភពស្និទ្ធនឹងលោក ចាន់ តារា បានបង្ហើបឲ្យដឹងថា អំពើពុករលួយរបស់លោក ចាន់ តារា អាចប្រព្រឹត្តទៅយ៉ាងសុខស្រួលក៏មានកិច្ចសហការសហប្រាជាមួយបក្ខពួករបស់ខ្លួន។

 បញ្ហានេះលោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ មិនគួរមើលរំលងអំពើពុករលួយតាមច្រើនរូបភាពរបស់លោក ចាន់ តារា ប្រធានការិយាល័យគយច្រកទ្វារអន្តរជាតិព្រៃវល្លិ៍នោះទេ។ ដោយហេតុថាលោក គុណ ញឹម អគ្គនាយកនៃអគ្គនាយកដ្ឋានគយ និងរដ្ឋាករកម្ពុជា បានរក្សាភាពស្ងៀមស្ងាត់ ទោះបីអំពើពុករលួយរបស់លោក ចាន់ តារា មេគយច្រកព្រៃវល្លិ៍និងអំពើពុករលួយរបស់លោក ហេង សំបូរ ត្រូវបានលាតត្រដាងជាបន្តបន្ទាប់ក៏ដោយ។

តាមប្រភពពីមន្ត្រីគយនៅខេត្តស្វាយរៀងបានឲ្យដឹងថា ចាប់តាំងពីទទួលបានតំណែងជាប្រធានការិយាល័យគយច្រកទ្វារអន្តរជាតិព្រៃវល្លិ៍ ស្រុកកំពង់រោទ៍ ខេត្តស្វាយរៀង កាលពីថ្ងៃទី06 ខែកក្កដា ឆ្នាំ2020 រហូតមក គឺលោក ចាន់ តារា ប្រើតួនាទី និងអំណាចប្រមូលលុយតាមរបៀបពុករលួយយ៉ាងពេញបន្ទុក។ អំពើពុករលួយច្រើនបែបច្រើនយ៉ាងរបស់លោក ចាន់ តារា ប្រធានការិយាល័យគយច្រកទ្វារអន្តរជាតិព្រៃវល្លិ៍ អាចប្រព្រឹត្តទៅយ៉ាងសុខសាន្តគឺមានការបើកដៃពីសំណាក់លោក ហេង សំបូរ ប្រធានសាខាគយខេត្តស្វាយរៀង ដែលជាចៅហ្វាយនាយផងដែរ។ ប្រសិនបើគ្មានការបើកដៃពីលោក ហេង សំបូរ ទេនោះគឺលោក ចាន់ តារា មិនហ៊ានប្រព្រឹត្តអំពើពុករលួយពេញទំហឹងដូចសព្វថ្ងៃនេះឡើយ ហើយត្រូវប្រឈមនឹងការព្រមានជាមិនខាន។

មន្រ្តីពាក់ព័ន្ធនៅច្រកអន្តរជាតិព្រៃវល្លិ៍ បានឲ្យដឹងថា បច្ចុប្បន្នលោក ចាន់ តារា បើកដៃឲ្យឈ្មួញទាំងធំទាំងតូចនាំចូលទំនិញគេចពន្ធ និងទំនិញបង់ពន្ធមិនគ្រប់យ៉ាងពេញបន្ទុកដើម្បីផលប្រយោជន៍ផ្ទាល់ខ្លួនគ្មានញញើតអ្វីទាំងអស់។ ទំនិញដែលឈ្មួញធំៗនាំចូលយ៉ាងគំហុកតាមច្រកទ្វារអន្តរជាតិព្រៃវល្លិ៍ បង់ពន្ធមិនដល់50ភាគរយផងទេ ហើយក្រៅពីនេះក្រុមឈ្មួញបែងចែកផលប្រយោជន៍លើតុក្រោមតុជាមួយលោក ចាន់ តារា យ៉ាងរលូន។ ប្រភពបានបង្ហើបឲ្យដឹងទៀតថា ក្រុមឈ្មួញរត់ពន្ធទំនិញចូលទៅស្រុកយួនតាមច្រករបៀងក្បែរៗច្រកទ្វារអន្តរជាតិព្រៃវល្លិ៍​ ក៏ជាប្រភពចំណូលរបស់លោក ចាន់ តារា ផងដែរ ក្នុងខណៈដែលលោក ហេង សំបូរ មេគយខេត្តស្វាយរៀង រក្សាភាពស្ងៀមស្ងាត់។មានត