ភ្នំពេញៈ តាមប្រភពពីមន្ត្រីសូមមិនបញ្ចេញឈ្មោះមួយចំនួន នៃសាខាគយ និងរដ្ឋាករ ខេត្តកំពង់ស្ពឺបានសម្តែងការមិនសប្បាយចិត្ត និងបានសំណូមពរដល់ក្រសួងមុខងារសាធារណៈ និងក្រសួងសេដ្ឋកិច្ច និងហិរញ្ញវត្ថុ ក៏ដូចជាអគ្គនាយកដ្ឋានគយ និងរដ្ឋាករកម្ពុ មេត្តាពិនិត្យមើលករណីលោក ឈួន ហៃ ប្រធានសាខាគយ និងរដ្ឋាករ ខេត្តកំពង់ស្ពឺដោយមានការកូសលប់កែឆ្នាំកំណើត ពោលគឺពន្យាអាយុចូលនិវត្តន៍រយៈពេល ៥ឆ្នាំ ទៀត។

នៅក្នុងតារាងបៀវត្សឆ្នាំ២០២១ លេខរៀង ១២៩៨ ឈ្មោះ  ឈួន   ហៃ   ភេទ ប្រុស កើតនៅថ្ងៃទី១ ខែមករា ឆ្នាំ១៩៦៣ ។ ចំណែកនៅក្នុងតារាងបៀវត្សឆ្នាំ២០២២ លេខរៀង ១២៩៧ ឈ្មោះ  ឈួន   ហៃ   ភេទ ប្រុស កើតនៅថ្ងៃទី១ ខែមករា ឆ្នាំ១៩៦៨ ។ ដោយសារមានការកែឆ្នាំកំណើតនេះ គឺលោកឈួន ហៃ នៅបន្តការងារបាន ៥ឆ្នាំទៀត។ 

បើតាមថ្ងៃខែឆ្នាំកំណើតដែល ប្រើប្រាស់ផ្លូវការនៅក្នុងតារាបៀវត្សបានបង្ហាញថាមកដល់ពេលនេះ លោក ឈួន ហៃ ត្រូវដល់អាយុចូលនិវត្តន៍ ប៉ុន្តែបែជាអាចបន្តធ្វើជាប្រធានសាខាគយ និងរដ្ឋាករ ខេត្តកំពង់ស្ពឺ រយៈពេល ៥ឆ្នាំបន្តទៀត។ ចំពោះមូលហេតុដែលលោក ឈួនហៃ បន្តការងារបាន ៥ឆ្នាំទៀត ដោយសារតែមានការប្រែប្រួលត្រង់ចំណុចថ្ងៃខែឆ្នាំកំណើត គឺពីឆ្នាំ១៩៦៣ មក ឆ្នាំ១៩៦៨។

ទាក់ទងនឹងការកែប្រែឆ្នាំកំណើត ដើម្បីពន្យាអាយុចូលនិវត្តន៍នេះ បានធ្វើឲ្យមានការរិះគន់យ៉ាងខ្លាំងពីសំណាក់មន្ត្រីបម្រើការនៅសាខាគយ និងរដ្ឋាករ ខេត្តកំពង់ស្ពឺ ។

ក្រុមមន្ត្រីមួយចំនួន នៃសាខាគយ និងរដ្ឋាករ ខេត្តកំពង់ស្ពឺ បានសំណូមពរឲ្យក្រសួងស្ថាប័នពាក់ព័ន្ធមានដូចជា ក្រសួងមុខងារសាធារណៈ និងក្រសួងសេដ្ឋកិច្ច និងហិរញ្ញវត្ថុ ពិនិត្យផ្ទៀងផ្ទាត់លើករណីលោក ឈួន ហៃ កែប្រែឆ្នាំកំណើត។ 

ជាមួយគ្នានេះ មន្ត្រីមួយចំនួនក៏បានស្នើដល់លោកគុណ ញឹម អគ្គនាយកគយ និងរដ្ឋាករកម្ពុជា គួរពិនិត្យមើលការពន្យាអាយុចូលនិវត្តន៍របស់លោក ឈួន ហៃ ប្រធានសាខាគយ និងរដ្ឋាករ ខេត្តកំពង់ស្ពឺ ផង។ 

ចំណែកលោកគុណ ញឹម អគ្គនាយកគយ និងរដ្ឋាករកម្ពុជា មិនអាចសុំការអត្ថាធិប្បាយបានទេដោយទូរស័ព្ទមិនមានអ្នកទទួល។

រីឯរដ្ឋមន្ត្រីក្រសួងមុខងារសាធារណៈ និងរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ មិនអាចសុំការអត្ថាធិប្បាយបានទេ ៕