តូចលេខ៥០៣ លោក ឃួន ជឿន នៅតែឃុបឃិតបើកច្រករបៀងអូរបីជាន់ឲ្យមេឈ្មួញនាំចូលទំនិញគេចពន្ធ
(បន្ទាយមានជ័យ)៖ប្រភពពីនាយទាហាននិងពលទាហានក្នុងអង្គភាពវរសេនាតូចការពារព្រំដែនលេខ៥០៣ បានឲ្យដឹងថា បច្ចុប្បន្នលោកឧត្តមសេនីយ៍ត្រី ឃួន ជឿន ដែលជាមេបញ្ជាការយោធាអង្គភាពវរសេនាតូចលេខ៥០៣ នៅតែឃុបឃិតបើកច្រករបៀងអូរបីជាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ឲ្យឈ្មួញនាំចូលទំនិញគេចពន្ធ ទំនិញខុសច្បាប់ ម៉ូតូគេចពន្ធស៊េរីទំនើបៗនិងរថយន្តចង្កូតស្ដាំទៀតផង។ ជាងនេះទៅទៀតនៅច្រករបៀងអូរបីជាន់ បច្ចុប្បន្នឈ្មួញអាចនាំចូលគោក្របី ជ្រូករស់ មាន់ទារស់ ពីទឹកដីសៀមចូលទឹកដីខ្មែរយ៉ាងពេញបន្ទុកព្រោះមានការឃុបឃិបើកដៃពីសំណាក់មន្ត្រីពុករលួយជាប្រព័ន្ធ។ ចំណែកលោក សួន បវរ អភិបាលខេត្តបន្ទាយមានជ័យ មិនចាត់វិធានការបិទច្រករបៀងអូរបីជាន់ ដើម្បីឲ្យស្របតាមបទបញ្ជារបស់ក្រសួងមហាផ្ទៃនោះទេ។
ប្រភពពីមន្ត្រីអាជ្ញាធរមូលដ្ឋាននិងសមត្ថកិច្ចមូលដ្ឋានក្នុងឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ បានឲ្យដឹងថា បច្ចុប្បន្នច្រករបៀងអូរបីជាន់ ដែលស្ថិតក្រោមការគ្រប់គ្រងរបស់អង្គភាពយោធាវរសេនាតូច៥០៣ គឺជាច្រកដែលឈ្មួញនាំចូលទំនិញគេចពន្ធ និងទំនិញខុសច្បាប់យ៉ាងពេញបន្ទុក។ ជាក់ស្ដែងមួយរយៈចុងក្រោយនេះឈ្មួញនាំចូលគោក្របីនិងមាន់ទារស់ពីស្រុកសៀម តាមច្រកនេះយ៉ាងអនាធិបតេយ្យដែលជាមូលហេតុធ្វើឲ្យរដ្ឋត្រូវខាតបង់ចំណូលពន្ធយ៉ាងច្រើនសន្ធឹកសន្ធាប់ក្នុងមួយខែៗ។ បើតាមប្រភពខ្លះបានឲ្យដឹងថា ការដែលលោក ឃួន ជឿន មេបញ្ជាការយោធាវរសេនាតូចលេខ៥០៣ ហ៊ានធ្វើអ្វីៗតាមអំពើចិត្តគឺដោយសារអាងមានលោកឧត្តមសេនីយ៍ឯក ប៊ុន សេង មេបញ្ជាការយោធាយោធភូមិភាគ៥ផងដែរ។ ប្រសិនបើគ្មានការឃុបឃិតបើកដៃពីសំណាក់លោក ប៊ុន សេង ទេនោះគឺលោក ឃួន ជឿន មិនហ៊ានធ្វើអ្វីៗតាមអំពើចិត្តឡើយ។
គួររំលឹកដែរថាថ្មីៗនេះក្រសួងមហាផ្ទៃ បានចេញបទបញ្ជាថ្មីទៀតឲ្យអាជ្ញាធរខេត្តបន្ទាយមានជ័យ និងសមត្ថកិច្ចខេត្តបន្ទាយមានជ័យ បិទច្រករបៀងទាំងអស់តាមព្រំដែនខ្មែរ-សៀម ក្នុងខេត្តបន្ទាយមានជ័យ ដើម្បីទប់ស្កាត់កុំឲ្យបទល្មើសផ្សេងៗកើតឡើងយ៉ាងរាលដាលបន្តទៀត។ ក៏ប៉ុន្តែជាក់ស្ដែងច្រករបៀងដែលគ្រប់គ្រងដោយអង្គភាពនគរបាលការពារព្រំដែននិងយោធាការពារព្រំដែននៅក្នុងស្រុកម៉ាឡៃ ស្រុកអូរជ្រៅ ក្រុងប៉ោយប៉ែត ស្រុកថ្មពួក និងស្រុកស្វាយចេក ជាច្រើនកន្លែងនៅតែដំណើរការយ៉ាងរលូន។ ក្នុងនោះច្រករបៀងអូរបីជាន់ នៅឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ដែលស្ថិតក្រោមការគ្រប់គ្រងរបស់យោធាវរសេនាតូចលេខ៥០៣ ដែលមានលោក ឃួន ជឿន ជាមេបញ្ជាការ កំពុងក្លាយជាច្រកដែលឈ្មួញនាំចូលទំនិញគេចពន្ធ និងទំនិញខុសច្បាប់យ៉ាងគគ្រឹកគគ្រេង។ ដូច្នេះថ្នាក់ដឹកនាំក្រសួងមហាផ្ទៃ គួរពិនិត្យឡើងវិញអំពីភាពអសកម្មរបស់មន្ត្រីអាជ្ញាធរនិងសមត្ថកិច្ចក្នុងខេត្តបន្ទាយមានជ័យ ជាបន្ទាន់ព្រោះបច្ចុប្បន្នច្រករបៀងអូរបីជាន់ និងច្រករបៀងជាច្រើនកន្លែងទៀត នៅតែដំណើរការយ៉ាងរលូនដោយខ្វល់ពីអ្វីឡើយ..?។
![]()
![]()
![]()